「年輕人買唔到樓，又想自己有個空間，畀軀體同個靈魂出去遊走一下，就去買車。」運房局局長呀可？陳帆呀可？喂！我都想「軀體同靈魂遊走」，但抬頭吧，高樓價掩蓋了晨曦，因為香港後生仔真係好絕望，甚麼叫絕望？抬起眼望望，如今我在你面前呈堂隨便收看。
有幾絕望，只要睇吓六合彩帶俾人幾多希望。由細到大，你多少都講過一次「如果我中到六合彩頭獎就好啦。」有幾好？2010年11月前，頭獎獎金保證係500萬元，分分鐘買到三個嘉湖山莊500幾呎單位，咁就緊係好啦！今時今日？只係買到1個咁大把；就算依家頭獎獎金保證升到800萬，咪買到一個大少少市區有房單位，會致富嗎？唔會，最多只係安心。
每買一注六合彩，係買一個希望，一個致富的希望。但香港被樓市玩死，玩到連中六合彩都唔算係一個發達希望。
實情係，由2003年升到2017年，香港後生仔根本係被逼打緊一舖機，而呢舖機，係注定俾人屈爆機。
你想買樓，Package劉講過，「忘記旅行，向著標竿直跑」，咁你就買到樓。你好努力儲錢，儲到30萬，支標竿飄移去50萬；你跑到去50萬，佢就飄移到100萬。大佬呀，好哋哋一支竿點解會郁，除非有鬼！係有鬼呀，隻鬼叫死窮鬼。以前身家百萬叫富翁，依家身家百萬？算什麼？然後林鄭都同你講，「我都買唔起樓呀」，咁你仲可以講咩？
唔買樓，咁買車啦，要「真上車」唔係好貴，幾皮嘢夠，但你睇吓車位？今日睇數據，香港領牌車輛數目，由2006起10年升35%至74.6萬架，當中私家車數目增加45%；但泊車位呢，同期增幅只有9.5%。
睇埋陳帆局長仲講咩，「希望增加公共交通效率、方便及舒適度，減少市民買車的意欲，讓未來私家車增長能理性一些，最後才考慮增加首次登記稅。」
我上唔到車，去買車，本身件事已經好反智，然後你同我講，「我知你想買車，但我想你都理性一點，於是我會諗方法去打擊你買車既意欲。」大佬呀，你叫一個畀樓價逼埋牆角嘅人理性？咁點解你唔去叫啲的士司機講「過海？唔去！」時理性啲？
咁我明點解車位咁多年會唔夠，就好似當日政府為減少廢物，精心設計個細嘅垃圾桶；依家唔想你買車，咪唔諗點畀車位你，一貫的goodest logic。
六合彩買唔到希望都算，上車，支竿飄移搞到我卡關；到買車，你又閘住我。他日我「軀體同靈魂遊走」，真正死埋，會唔會難逃被屈機命運，連骨灰龕都上唔到，僅有願望都難風光殮葬。
by千頌C@堆填區
http://fb.com/winbigwok
Search